Value Based Education

Sími 4415400

Lundur s.8214918

Fyrirsagnalisti

Gjöf foreldrafélagsins - 28.6.2018

Í dag voru peningarnir frá foreldrafélaginu notaðir til að kaupa spil og leikföng fyrir allar deildir leikskólans. Einnig fékk styrktarbarn leikskólans 5000 krónur í sinn hlut.  Takk kærlega fyrir okkur!

Gönguferð í blíðunni - 20.6.2018

Í dag var sólskinsveður og því var tækifærið nýtt og farið í gönguferð niður í dal og tveir róluvellir heimsóttir í leiðinni.

Upplýsingatækni - 18.6.2018

Það vannst ekki tími til að vinna að leir-hreyfimyndunum á föstudaginn vegna sumarhátíðarinnar. Við fórum því í verkið í dag. Börnin skemmtu sér konunglega við að útbúa hreyfimyndir með leir. Mikill frumleiki var ríkjandi í sögugerðinni hjá þeim. 


Upplýsingatækni - 14.6.2018

Við héldum áfram að æfa okkur í StoppMotion forritinu. Börnin notuðu leir til þess að búa til persónur og sömdu smá sögu jafnóðum og þau leiruðu. Þetta gekk frábærlega hjá þeim, enda áhugasamir nemendur. 

Gönguferð um hverfið - 12.6.2018

Í dag fórum við í gönguferð um hverfið og stoppuðum meðal annars við Álfhólsskóla Hjallamegin og fórum í leiki. Veðrið var gott og tíminn þaut frá okkur.

Upplýsingatækni - 8.6.2018

Í þessari viku voru börnin að læra á smáforritið StoppMotion. StopMotion er frábært app sem notað er til hreyfimyndargerðar. Í notkun þess gildir að vera hugmyndaríkur, því notkunarmöguleikarnir eru óþrjótandi. Börnin voru snögg að læra á smáforritið og úr urðu skemmtilegar hreyfimyndir, þó svo þetta væri frumraun þeirra í forritinu. Vel gert hjá þeim! 

Hér má sjá

 sýnishorn af myndunum þerra. 


Gönguferð á Víghól - 5.6.2018

Í dag fórum gengum við á Víghól í fyrstu brakandi veðurblíðu sumarsins.  Þar fórum við í fótbolta, sippuðum og fengum nesti áður en haldið var heim á leið.

Sóblómahátíð - 1.6.2018

Mikil stemmning var á Sólblómahátíðinni í ár sem haldin var að venju í Ráðhúsi Reykjavíkur.  Við tókum rútu saman með lekskólanum Efstahjalla og gengum svo fylktu liði frá Lækjartorgi að Ráðhúsinu.  Þar nutum við veitinga og sá Sirkus Íslands um að halda uppi stuðinu. Alls eru um 30 Sólblómaleikskólar víðs vegar um landið en það eru leikskólar sem styrkja SOS barnaþorpin.

Upplýsingatækni - 28.5.2018

Í dag var komið að uppskerustund á Lundi. Börnin voru búin að klára sögugerð sína í Puppet Pals og það var komið að því að skoða „bíómyndir“ allra hópa. Það var mikið hlegið og það er alltaf jafn skemmtilegt hvað sum þeirra verða feimin þegar þeirra saga birtist á tjaldinu. Það var misjafnt hverslu mikið hóparnir lögðu i söguna sína, en allir voru mjög sáttir með útkomuna. Ég ákvað að setja sögurnar saman sjálf í þetta sinn í iMovie, það hefur ekki verið tími til þess að fara í það forrit með börnunum eftir áramót. Ég ákvað að setja framan við sögurnar myndir og myndbrot frá forvinnunni, svona til þess að sýna hversu mikil vinna það er sem liggur að baki sögugerðinni. Hér fyrir neðan eru myndir frá stund okkar í dag og svo er „bíómyndin“ hér.  


Heimsókn í Hvalasafnið - 17.5.2018

Í dag tókum við rútu alla leið út á Granda í Reykjavík þar sem Hvalasafnið er til húsa.  Þar nutum við vandaðrar leiðsagnar um safnið og svo fengu börnin að leika sér í leikhorninu sem nýlega er búið að setja upp.

Útskrift - 4.5.2018

Í dag voru Lundarbörnin útskrifuð og þeim færð sjálfsmynd sín til eignar sem þau hafa unnið að í allan vetur. Að því loknu var öllum boðið í pylsupartý.

Upplýsingatækni - 3.5.2018

Í þessari viku voru börnin að læra grunnatriði forritunar í þessum leik. Börnin hjálpast að við að koma einu barni á ákveðinn reit til þess að barnið geti fengið sér rúsínu. Kenndar eru skipanirnar fram, aftur, til hliðar, snúa til hægri og vinstri. Þessir snillingar fóru bara létt með þetta, það var helst að hægri og vinstri vafðist fyrir þeim. Smellið hér til þess að sjá myndbrotið. 


Upplýsingatækni - 27.4.2018

Þessa viku voru börnin að taka upp söguna/ævintýrið sitt í smáforritinu Puppet Pals. Þetta var endapunkturinn á langri leið, eins og lesendur síðunnar hafa tekið eftir. Fyrst æfðu börnin sig mikið í forritinu, sömdu sögu, gerðu söguborð, útbjuggu allar persónur og fylgihluti og bakgrunna. Þá komu þau öllu saman inn í forritið og svo í þessari viku hófst upptakan. Við vorum svo lánsöm að fá að setja upp upptökuver í innra herbergi á Hlíð, þar er nánast enginn hávaði þegar öll börnin eru úti. Upptökurnar gengu mjög vel og börnin eru afar sátt með sögurnar sínar. Nú á eftir að ganga frá þeim þannig að hægt sé að sýna þær allar saman sem bíómynd. Við munum gera það saman í iMovie smáforritinu í iPadinum. Börnin ætla að bjóða öllum leikskólanum í bíó, með poppi og alles. Það verður gaman. 



Umhverfisálfar - 27.4.2018

Það fóru tveir umhverfisálfar um leikskólann í morgun. Þeir skoðuðu vel og vandlega hvort allir séu að standa sig við flokkun. Álfarnir byrjuðu á því að athuga hvernig starfsfólkið stendur sig, bæði í undirbúningsherberginu og í eldhúsinu. Þar var allt til fyrirmyndar. Síðan spurðu álfarnir hvort fullorðnir og börn eru dugleg að flokka sorpið, borða vel og drekka mikið vatn. Síðan en ekki hvað síst var spurt að því hvort allir væru friðsælir. Álfarnir litu niður í alla flokkunarkassa og ef deildirnar voru að standa sig fengu þær viðurkenningu, mynd af Láka umhverfisálfinum okkar. Í dag fengu allir merki, allir duglegir að flokka hér í Álfaheiði. 


Dans - 27.4.2018

Hún Rakel Ýr Ísaksen hefur verið að kenna börnunum dans síðan í vor og verður afraksturinn sýndur á opnu húsi föstudaginn 4. maí.


Upplýsingatækni - 20.4.2018

Við héldum áfram að vinna að persónugerð og búa til bakgrunna fyrir leikritin. Núna eru allir búnir svo að í næstu viku förum við að taka upp. Þetta hefur reynst aðeins tafsamara en við reiknuðum með vegna allra þessara frídaga. Meira hvað það er að trufla okkur að geta ekki verið í skólanum alla daga vikunnar. Börnin eru einstaklega áhugasöm um þessa vinnu og hlakka mikið til að byrja á upptökum. Við erum að hugsa um að verða okkur úti um stóran pappakassa til þess að freista þess að einangra umhverfishljóð. Spennandi hvernig þetta tekst til hjá þeim. 

Barnaóperan Gilitrutt - 17.4.2018

Í dag fórum við í Salinn í Kópavogi og hlýddum á barnaóperuna Gilitrutt. Óperan er samstarfsverkefni Hildigunnar Rúnarsdóttur tónskálds, Sölku Guðmundsdóttur rithöfundar og Heiðu Rafnsdóttur myndlistarmanns. Börnunum kom á óvart hve mikið var sungið og lítið talað en skemmtu sér engu að síður konunglega.

Kynning á Álfhólsskóla - 13.4.2018

Í þessari viku fórum við í 4 heimsóknir upp í Álfhólsskóla og fengum að kynnast skólastarfinu þar. Við kíktum meðal annars inn í smíðatíma, handavinnu, heimilisfræði, tölvutíma og leikfimi.  Einnig fengum við að kynnast dægradvölinni og kíktum við inn í bekki þar sem við leystum verkefni með fyrsta bekk.  Börnin voru bæði mjög áhugasöm og háttprúð og gekk þetta eins og best var á kosið.

Upplýsingatækni - 6.4.2018

Þessa viku og reyndar líka í vikunni fyrir páska héldu börnin áfram að vinna að sögunni sinni. Nú var komið að því að útbúa allar persónur og leikendur í sögunni ásamt bakgrunnum. Börnin tóku alveg ákvörðun um það sjálf hvernig persónurnar ættu að líta út og lögðu sig öll fram um að gera vel. Það var mikið nostrað við sumar persónurnar, enda voru börnin ánægð með útkomuna. Þau tóku svo ljósmyndir af verkunum og settu inn í Puppet Pals forritið. Í næstu viku höldum við svo áfram í þessari skapandi vinnu, því það voru ekki öll börnin mætt til þess að klára, en svo taka við upptökur, en sennilega verðum við að sæta lagi við þær þegar hljóðlátt er í leikskólanum. 

Umhverfisálfar - 6.4.2018

Það fóru tveir umhverfisálfar um leikskólann í morgun. Þeir skoðuðu vel og vandlega hvort allir séu að standa sig við flokkun. Spurðu svo hvort fullorðnir og börn eru dugleg að flokka sorpið, borða vel og drekka mikið vatn. Síðan en ekki síst var spurt að því hvort allir væru friðsælir. Álfarnir litu niður í alla flokkunarkassa og ef deildirnar voru að standa sig fengu þær viðurkenningu, mynd af Láka umhverfisálfinum okkar. Í dag fengu allir merki, enda sérlega duglegt fólk hér í Álfaheiði.